top of page
ՇՆՈՐՀԱԼԻ ԴՊՐՈՑԻ ՄԱՍԻՆ
ՈՎ ԵՆՔ ՄԵՆՔ
Շնորհալի դպրոցը Սուրբ Աստվածածին Հայ Առաքելական Եկեղեցու կրթական առաքելությունն է, որի նպատակն է երեխաներին դաստիարակել հայոց լեզվի, քրիստոնեական հավատքի և հայ ժողովրդի հարուստ մշակութային ու ազգային ժառանգության ոգով։ Այն ավելին է, քան պարզապես շաբաթօրյա դպրոց․ Շնորհալին կենդանի կրթական համայնք է, որտեղ երեխաները ճանաչում են իրենց ինքնությունը, ամրապնդում իրենց հավատքը և ձևավորում ամուր կապ իրենց հայկական արմատների հետ։
Մեր առաքելությունն է նոր սերնդին փոխանցել հայոց լեզուն, պատմությունը, մշակույթը, ազգային ավանդույթներն ու հոգևոր արժեքները՝ դաստիարակելով գիտակից, ինքնավստահ, պատասխանատու և հայրենասեր հայ երիտասարդներ, որոնք կպահպանեն ու կշարունակեն մեր ազգային և քրիստոնեական ժառանգությունը։
Դպրոցի կրթական ծրագիրը հիմնված է երկու փոխլրացնող ուղղությունների վրա՝ Հայագիտական կրթություն և Քրիստոնեական դաստիարակություն։
Հայագիտական կրթության շրջանակում աշակերտներն ուսումնասիրում են հայոց լեզուն, պատմությունը, մշակույթը, երաժշտությունը, գրականությունն ու ազգային ժառանգությունը՝ միաժամանակ զարգացնելով իրենց լեզվամտածողությունը, հաղորդակցական հմտություններն ու ազգային ինքնագիտակցությունը։
Քրիստոնեական դաստիարակության միջոցով աշակերտները ծանոթանում են Հայ Առաքելական Եկեղեցու հավատքին, տոներին, ծեսերին, ավանդույթներին և հոգևոր կյանքին։ Դասարանական ուսուցումը համադրելով եկեղեցական կյանքի ակտիվ մասնակցության հետ՝ նրանք ոչ միայն ձեռք են բերում գիտելիքներ իրենց հավատքի մասին, այլև ձևավորում անձնական և կենդանի կապ Աստծո և իրենց Մայր Եկեղեցու հետ։
Շնորհալի դպրոցում կրթությունը չի սահմանափակվում դասարանով։ Յուրաքանչյուր դաս, մշակութային ծրագիր, եկեղեցական արարողություն, տոնակատարություն և համայնքային նախաձեռնություն հնարավորություն է տալիս երեխաներին աճել մտավոր, հոգևոր և մշակութային առումով՝ ձևավորելով նրանց որպես հավատավոր քրիստոնյաներ, ազգային արժեքներին հավատարիմ հայեր և մեր համայնքի ապագա պատասխանատու առաջնորդներ։
ՏԱՐՎԱ ԱՄՓՈՓ ՆԿԱՐԱԳԻՐԸ
Դպրոցի ուսուցիչները տնօրինության աջակցությամբ մշակել են մասնագիտացված ուսումնական ծրագրեր՝ մեր համայնքի հայեցի կրթության կարիքներին և պահանջներին ծառայեցնելու համար: Մեր աշակերտների համար լավագույն գիտելիքներ և արդյունքներ ձեռք բերելու նպատակով ծրագրերը խարսխված են անհատական մոտեցման սկզբունքի վրա:
Նախակրթարանից մինչև 8-րդ կրթական հարթակների աշակերտների համար դպրոցն առաջարկում է և՛ արևելահեյերենի, և՛ արևմտահայերենի դասեր: 9-12-րդ դասարանների աշակերտների համար դպրոցն առաջարկում է կրոնի դասեր և համայնքային կամավոր ծառայության հնարավորություն: Դպրոցը նաև առաջարկում է արվեստի և շախմատի արտադասարանական խմբակներ: Դպրոցի ընդունելությունը կատարվում է հայերենի իմացության ստուգմամբ՝ աշակերտի համապատասխան կրթական մակարդակը պարզելու համար։
Ի լրումն առկա ռեսուրսների և դասագրքերի, ամեն շաբաթ ուսուցիչները մշակում են անհատական դասապլաններ, մշակութային գիտելիքներով հագեցած կրթական նյութեր՝ աշակերտներին հայ նշանավոր արվեստագետներին, կոմպոզիտորներին, բանաստեղծներին, գիտնականներին ծանոթացնելու նպատակով:
Ուսումնական տարին բաղկացած է 4 եռամսյակից։ Յուրաքանչյուր եռամսյակի վերջում աշակերտները հանձնում են եռամսյակի ավարտական թեստեր, իսկ ծնողները ստանում են իրենց երեխայի առաջադիմության բնութագիր ու մասնակցում եռամսյակի ավարտի ծնողական ժողովներին:
Դպրոցն առաջարկում է նաև Պատարագի կրթություն առավոտյան ծրագիր, որն անցկացվում է եկեղեցու խորանում: Ծրագրի ընթացքում աշակերտները ծանոթանում են սուրբ պատարագի կառուցվածքին, բովանդակությանը, երգում են պատարագից հատվածներ և սովորում են մեր եկեղեցու օրացուցային նշանավոր օրերի և տոնակատարությունների մասին։
ՀՈԳևՈՐ ԿՐԹՈՒԹՅՈՒՆ և ԵԿԵՂԵՑԱԿԱՆ ԿՅԱՆՔ
Շնորհալի դպրոցում հոգևոր կրթությունը մեր առաքելության անբաժանելի մասն է։ Մեր նպատակն է ոչ միայն երեխաներին ծանոթացնել Հայ Առաքելական Եկեղեցու հավատքին և ավանդույթներին, այլև օգնել նրանց ձևավորել կենդանի և ամուր կապ իրենց Մայր Եկեղեցու հետ՝ աղոթքի, պաշտամունքի, ուսուցման և եկեղեցական կյանքի ակտիվ մասնակցության միջոցով։
Շնորհալի դպրոցի կարևոր առանձնահատկություններից է Պատարագի կրթության առավոտյան ծրագիրը, որն անցկացվում է եկեղեցու խորանում։ Այս 30-րոպեանոց ծրագրի ընթացքում աշակերտները ծանոթանում են Սուրբ Պատարագի կառուցվածքին և խորհրդին, սովորում են Պատարագից հատվածներ, երգում են շարականներ և ավելի խորությամբ ճանաչում Հայ Առաքելական Եկեղեցու տոները, ավանդույթներն ու հոգևոր արժեքները։
Կրոնի դասերի շրջանակում աշակերտները նաև ամիսը մեկ մասնակցում են Սուրբ Պատարագին։ Այդ այցելությունների ընթացքում նրանք հնարավորություն են ունենում ոչ միայն հետևելու Պատարագի ընթացքին, այլև ակտիվորեն մասնակցելու ժամերգությանը։ Տեր Հոր առաջնորդությամբ երեխաները ծնկաչոք մասնակցում են Ապաշխարության և Թողության կարգին, իսկ մկրտված աշակերտները հնարավորություն են ու
նենում մոտենալու Սուրբ Հաղորդությանը։
Շնորհալի դպրոցը հնարավորինս լայն հնարավորություններ է ստեղծում, որպեսզի աշակերտները դառնան եկեղեցական կյանքի ակտիվ մասնակիցներ։ Ամեն կիրակի աշակերտներից մեկը Սուրբ Պատարագի ընթացքում ընթերցում է Կեսօրվա Ընթերցվածքը՝ Սուրբ Գրքից։ Սա հիշարժան և ոգեշնչող փորձառություն է ինչպես երեխաների, այնպես էլ նրանց ընտանիքների համար, քանի որ նրանք հնարավորություն են ունենում Աստծո Խոսքը փոխանցելու ամբողջ համայնքին։
Երեխաները քրիստոնեական կյանքի կարևոր մասն են։ Դիտարկման, անմիջական մասնակցության և հոգևոր առաջնորդության միջոցով նրանք սովորում են աղոթել, երկրպագել, ծառայել և ապրել եկեղեցու կյանքով։ Եկեղեցին այն վայրն է, որտեղ երեխաները սովորում են քրիստոնեական արժեքները, առաքինությունները և Աստծո Խոսքը, իսկ ամենակարևորը՝ զգում են Աստծո ներկայությունն ու առաջնորդությունն իրենց կյանքում։
Դասարանում ստացած գիտելիքը միավորելով կենդանի հավատքի, աղոթքի, պաշտամունքի և համայնքային կյանքի հետ՝ Շնորհալի դպրոցն օգնում է իր աշակերտներին ձևավորել ամուր հոգևոր հիմք և գիտակցել իրենց կարևոր դերը Հայ Առաքելական Եկեղեցու և մեր համայնքի կյանքում։
ՈՒՍՈՒՄՆԱԿԱՆ ՀԱՐԹԱԿՆԵՐ և ԾՐԱԳՐԵՐ
Շնորհալի դպրոցի ուսուցիչներն ու տնօրինությունը մշակել են ծրագրեր, որոնք համադրում են դասագրքային նյութը, անհատական դասապլանները և մշակութային հարուստ բովանդակությունը։ Ամեն շաբաթ ուսուցիչները պատրաստում են դասեր ու նյութեր, որոնք ոչ միայն զարգացնում են լեզվական հմտությունները, այլև աշակերտներին ծանոթացնում են հայ նշանավոր արվեստագետներին, գրողներին, բանաստեղծներին, կոմպոզիտորներին, գիտնականներին և պատմական կարևոր իրադարձություններին։
Խոսակցական հայերեն ծրագիրը շարունակում է մնալ ուսումնական ծրագրի կարևոր մասերից մեկը։ Այն աշակերտներին հնարավորություն է տալիս գործնականում կիրառել հայերենը` զարգացնելով խոսքի սահունություն, ինքնավստահություն և առօրյա հաղորդակցական հմտություններ։ Ծրագիրը օգտակար է տարբեր մակարդակների աշակերտների համար, քանի որ յուրաքանչյուր երեխա կարողանում է հայերեն խոսել, լսել և արտահայտվել իր կարողություններին համապատասխան միջավայրում։
Այս տարվա կարևոր նորամուծություններից է նաև վերանայված եռաստիճան նախակրթարանային համակարգը։ Այն ստեղծվել է տարբեր տարիքային և լեզվական մակարդակ ունեցող երեխաների կարիքները ավելի ճիշտ բավարարելու համար։ Նախակրթարանի յուրաքանչյուր փուլ աստիճանաբար զարգացնում է երեխայի հայերենի բառապաշարը, լսելու և խոսելու կարողությունները, մշակութային գիտակցությունը և պատրաստվածությունը հաջորդ ուսումնական մակարդակին։
Հայոց լեզվի, մշակույթի և կրոնական կրթության դասերից բացի դպրոցում անցկացվում են նաև պատմության և երաժշտության 30-րոպեանոց դասեր՝ շաբաթական հերթափոխով։ Պատմության դասերը վարում է Հայկարամ Նահապետյանը՝ աշակերտներին ներկայացնելով հայոց պատմության կարևոր թեմաները և ազգային ինքնության ձևավորման նշանակալի փուլերը։ Երաժշտության դասերը, որոնք ղեկավարում է Արմինե Խաչատրյանը, աշակերտներին ծանոթացնում են հայկական երաժշտական ժառանգությանը՝ ժողովրդական երգերից մինչև հայ նշանավոր կոմպոզիտորների ստեղծագործություններ։
Դպրոցը առաջարկում է նաև արտադասարանական խմբակներ՝ Շախմատ, Մանրանկարչություն և թռչնատառեր, Զանգակներ, Հոգևոր երգչախումբ և Դպիրների վերապատրաստում, որոնք լրացնում են հիմնական ուսումնական ծրագիրը և երեխաներին տալիս են ստեղծագործելու, համագործակցելու և իրենց հետաքրքրությունները զարգացնելու հնարավորություն։
Դասարանական ուսուցումից բացի, դպրոցի միջոցառումները, հանդեսներn ու մշակութային ծրագրերը երեխաներին տալիս են դասարանի պատերից դուրս սովորելու լրացուցիչ հնարավորություն: Այս ծրագրերի միջոցով աշակերտները զարգացնում են ինքնավստահություն, ստեղծագործական միտք և ավելի ամրապնդում իրենց կապը հայ լեզվի, մշակույթի և ազգային ինքնության հետ։
ԱՐՏԱԴՊՐՈՑԱԿԱՆ ԽՄԲԱԿՆԵՐ
Շնորհալի դպրոցն առաջարկում է բազմազան արտադասարանական խմբակներ, որոնք հարստացնում են աշակերտների կրթական փորձառությունը դասարանից դուրս։ Այս ծրագրերը հնարավորություն են տալիս երեխաներին զարգացնել նոր հմտություններ, բացահայտել իրենց հետաքրքրությունները, ամրապնդել կապը հայ մշակույթի և Հայ Եկեղեցու հետ, ինչպես նաև ձևավորել համագործակցության, ստեղծագործելու և առաջնորդության կարողություններ։
ՇԱԽՄԱՏԻ ԽՄԲԱԿ
Շախմատի խմբակը զարգացնում է աշակերտների տրամաբանական մտածողությունը, կենտրոնացումը, ռազմավարական պլանավորումը և խնդիրներ լուծելու կարողությունները։ Դասերի ընթացքում երեխաները սովորում են շախմատի կանոններն ու տարբեր մարտավարություններ, խաղում են միմյանց հետ և զարգացնում ինքնավստահությունն ու մարզական ազնվությունը։
ՄԱՆՐԱՆԿԱՐՉՈՒԹՅՈՒՆ և ԹՌՉՆԱՏԱՌԵՐ
Այս խմբակը երեխաներին ծանոթացնում է հայկական մանրանկարչության և թռչնատառերի հարուստ արվեստին։ Ստեղծագործական աշխատանքների միջոցով աշակերտները սովորում են հայկական զարդարվեստի խորհրդանիշները, գույների և ձևերի կիրառությունը, միաժամանակ զարգացնելով իրենց գեղարվեստական ճաշակը, համբերությունը և մանրակրկիտ աշխատելու հմտությունները։
"ՆԱՐԵԿ" ԶԱՆԳԱԿՆԵՐԻ ԵՐԳՉԱԽՈՒՄԲ
Զանգակների խմբակում աշակերտները սովորում են ձեռքի զանգակների նվագարկման արվեստը՝ զարգացնելով երաժշտական լսողությունը, ռիթմի զգացողությունը և թիմային աշխատանքի հմտությունները։ Խմբակի անդամները մասնակցում են դպրոցի և եկեղեցու տարբեր միջոցառումներին՝ իրենց կատարումներով գեղեցկացնելով տոնական արարողությունները։
"ՇՆՈՐՀԱԼԻ ՁԱՅՆԵՐ" ՀՈԳևՈՐ ԵՐԳՉԱԽՈՒՄԲ
Հոգևոր երգչախումբը հնարավորություն է տալիս աշակերտներին սովորել և կատարել Հայ Առաքելական Եկեղեցու շարականներն ու հոգևոր երգերը։ Երգեցողության միջոցով նրանք ավելի խորությամբ ճանաչում են հայկական հոգևոր երաժշտական ժառանգությունը, զարգացնում իրենց ձայնային ունակությունները և մասնակցում եկեղեցական արարողություններին ու տոնակատարություններին։
ԴՊԻՐՆԵՐԻ ՎԵՐԱՊԱՏՐԱՍՏՈՒՄ
Դպիրների վերապատրաստման ծրագիրը նախապատրաստում է աշակերտներին գիտակցաբար և պատասխանատվությամբ ծառայելու Սուրբ Պատարագի ընթացքում։ Տեր Հոր առաջնորդությամբ նրանք սովորում են եկեղեցական կարգը, աղոթքները, ժամերգության ընթացքը և խորանի սպասավորության կարևորությունը՝ դառնալով Հայ Եկեղեցու կյանքի ակտիվ մասնակիցներ։
ՀԱՅԿԱԿԱՆ ԺՈՂՈՎՐԴԱԿԱՆ ՊԱՐԻ ԽՄԲԱԿ
Հայկական ժողովրդական պարի խմբակը աշակերտներին ծանոթացնում է հայկական պարարվեստի հարուստ ավանդույթներին՝ զարգացնելով սերը հայ մշակույթի և ազգային ժառանգության նկատմամբ։ Սովորելով Հայաստանի տարբեր գավառների ավանդական պարերը՝ երեխաները զարգացնում են շարժողական հմտությունները, ռիթմի զգացողությունը, թիմային համագործակցությունը և ինքնավստահությունը։ Խմբակի սաները պարբերաբար ելույթ են ունենում դպրոցի հանդեսներին, մշակութային միջոցառումներին և համայնքային տոնակատարություններին՝ հպարտությամբ ներկայացնելով և պահպանելով հայկական պարարվեստի հարուստ ժառանգությունը։
ԵԶՐԱԿԱՑՈՒԹՅՈՒՆ
Շնորհալի դպրոցի առաքելությունն ու առաջնահերթությունն է մեր երեխաներին կրոնի, հայոց լեզվի, հայոց պատմության և մշակույթի ուսուցումը և հայ աշակերտների նոր սերունդ դաստիարակելու և կրթելու ցանկությունը, որը կօգնի պահպանել մեր ժառանգությունն ու մշակույթը։
bottom of page